Montserrat

Bruc, filmo kun Montserrata scenejo

karulo — Thu, 16 May 2013 16:29:37 +0000

Bruc, La legendo kun esperantaj subtekstoj.

La montaro vidita el vilaĝo Marganell

karulo — Mon, 13 May 2013 17:09:23 +0000

Jen la montaro Montserrat rigardata el ne kutima angulo, iom pli norda (monaĥejo troviĝas maldekstre, trans la montopintoj). Igualada troviĝas ankaŭ transmonte, je duonhora aŭtoveturado tra loka ŝoseo.

Ĉi tie, en Marganell, troviĝas ankaŭ populara fonto kaj pluraj restoracioj. Malabundas tamen eksterlandaj vizitantoj, kiu preferas facilajn transportojn kaj rapidan atingon de la monaĥeja ofertaro, lerte reklamitaj de la turismagentoj.

Jen sube du detaloj de Marganell.

Feriu proksime de Montserrat kaj Barcelono

karulo — Tue, 19 Mar 2013 11:27:43 +0000

Se vi planas ĉijare ferii en Katalunio, mi ĵus preparas oferton por vi kaj unu akompananton. Mia loĝejo estas granda kaj posedas unu liberan ĉambron kun du litoj. La apartamento ne estas en Barcelono, turisme grava kaj altira urbo sed ankaŭ ne malproksime, per ĉiutaga buso vi povas ĝin atingi post unuhora veturado. Ankaŭ per trajno eblas vojaĝi tien kvankam la vojaĝtempo estas iom plia. Ambaŭ stacioj troviĝas je 8 minutoj de la loĝejo.
Ankaŭ je simila proksimo estas la montaro Montserrat kaj ĝia fama Monaĥejo. En somero oni starigas busojn al la plej proksimaj plaĝoj, kun simila vojaĝdaŭro.
En la apartamento nuntempe loĝas du homoj, juna galegino kaj mi mem. Gastoj rajtas uzi ĉiujn komunajn servojn: du duŝejoj/necesejoj, granda kuirejo, lavejo, salono/manĝejo, balkono.
La domo disponas je konforta lifto. La kvartalo estas aparte trankvila, je iu ekstremo de la urbo ne tiom dense loĝata, kio cetere faciligas autoparkadon.
Igualada estas mezgranda urbo kun belaj promenejo kaj urbodoma placo. Same spektinda estas la konstruado de homkasteloj far la loka tradicia grupo Moixiganguers d’Igualada. Se vi interesiĝas pri moderna arkitekturo, rekomendindas vizito al la nova tombejo.
Interesa estas ankau la Ateneu Igualadí de la Classe Obrera, en kiu okazis perlegoj kaj kursoj pri esperanto komence de la pasinta jarcento.

La prezo de la gastoĉambro estas 10€/tage (1 aŭ 2 homoj). Por pli ol unusemajna restado oni povas pritrakti rabaton. Se temas pri familio kun infano(j) oni povas esplori eblecojn.
Lastinforme: la ĉambro estas ekipita per propra manlavujo kun apuda marmora platformo sur kiu mi baldau provizos mikroondaparaton).

Homo trairas montotruon fluge

karulo — Tue, 05 Feb 2013 10:39:39 +0000

La norvego Alexander Polli, 27 jarulo kies hobio estas flugado preskaŭ sen helpo de aparatoj, elektis pasintdecembre la pejzaĝon de Montserrat kiel fonon por unu el siaj spektaklaj travivaĵoj.

Li uzis apartan paraŝutistan teknikon konata kiel BAZA-salto.

Inter la diversaj provoj, elstaras la trairon de montotruo konata per la nomo Roca Foradada, kio kaŭzis la perplekson kaj miron de ekskursantoj kaj hazardaj vizitantoj de la regiono kiuj troviĝis proksimaj al la evento.

Pri ĝi raportis la retĵurnalo Vilaweb.

Virtuala Montserrat (Monaĥejo kaj ĉirkaŭo)

karulo — Mon, 14 May 2012 13:41:26 +0000

Se vi ne povas viziti la mirindaĵojn de Montserrat pro malproksimeco aŭ aliaj kialoj, jen ĉi tie la ebleco ĝui virtualan promenadon pere de interaktiva programo. Premante vian muson vi povas ruligi la bildon al ĉiuj direktoj.

Bovidoj en la Natura Parko

karulo — Tue, 17 Apr 2012 06:47:14 +0000

Iniciato pri produktado de ekologia bovviando helpas eviti incendiojn en la Natura Parko de Montserrat. En la norda montflanko, la bovoj nutriĝas per la subarbaraj kreskaĵoj kaj restaĵoj, purigante la plankon kaj malhelpante le disvastigon de fajroj.

vidu la fonton de la informo (katalune)

Piedpromeno 1: Monaĥejo-Els Degotalls-Monaĥejo

karulo — Tue, 12 Jul 2011 18:18:22 +0000

Disnivelo: 20 m. Distanco: 3’20 km. Daŭro: 50 min. Nivelo: tre facila.

Els Degotalls (La Akvolikoj)

La promenejo Els Degotalls (La Akvolikoj) iradas laŭ la montomuro subtenanta la ebenaĵo de Trinitat, kiu situas 200 m. super la vojo. Sube, kun Pireneoj kiel fona vidaĵo, la ebenaĵo nature viglas. Densa flaŭro, klara lumo kiu impresas kvazaŭ oni troviĝas ie ĉiele. La loko tre oportunas por ripozado.

Oni sekvu la ŝoseon laŭ la direkto al Monistrol. Antaŭ la konstruaĵo Mirador dels Apòstols (Kontemplejo de la Apostoloj) oni deflankiĝu sur la maldekstra vojo, kiu paralelas al la ŝoseo, en la direkto Nordorienta, ĝis la finangulo Els Degotalls (25 min.). Survoje oni povas spekti diversajn monumentojn religitemajn. El botanika vidpunkto elstaras la kverkoj (Quercus ilex) la takso (Taxus baccata) kaj la hacero (Hacer opalus).

Fonto de la bildo: Camí de Sant Jaume

La interaktiva mapo

karulo — Thu, 02 Jun 2011 05:57:50 +0000

Ŝlosilo de la interaktiva mapo de la monaĥejo de Montserrat kaj ĉirkaŭaĵoj. Laŭvicaj klarigoj de maldekstre dekstren:

Camí de Sant Jeroni / Vojo de Sankta Jeroni

Via Crucis / Vojo de la Krucumado

Bar de la plaça / Trinkejo de la placo

Cel·les (apartaments) / Ĉeloj (apartamentoj)

Espai audiovisual / Aŭdvida spaco

Funicular de Sant Joan / Funikularo de Sankta Johano

Oficina d’informació / Turisma oficejo

Restaurant de l’Hotel Abat Cisneros / Restoracio de la Hotelo Abat’ Cisneros

Hotel Abat Cisneros*** / Hotelo Abat’ Cisneros***

Museu de Montserrat / Muzeo de Montserrat

Centre de Coordinació Pastoral / Centro pri Pastora Kunordigado

La botiga de Montserrat / La vendejo de Montserrat

Funicular de la Santa Cova / Funikularo de la Sankta Groto

Porteria del Monestir / Akceptejo de la Monaĥejo

La Cafeteria / La Kafejo

Cremallera / Ziptrajno

Sant Miquel, Fra Garí, Sant Jeroni /(ekskurso-vojo al menciitaj lokoj)

Basílica / Baziliko (ĉefpreĝejo)

Mare de Déu / Dipatrino

Aeri / Kablovagono (telfero)

Camí de la Santa Cova / Vojo de la Sankta Groto

Zona de picnic / Piknikejo

Restaurant de Montserrat / Restoracio de Montserrat

Camí dels Degotalls o del Magnificat / Vojo de Degotalls (Elgutejoj) aŭ de Magnificat

Esglèsia de Santa Cecília / Preĝejo de Sankta Cecilia

Self-service / Memservejo

Edifici Mirador dels Apòstols / Konstruaĵo Rigardejo de la Apostoloj

La Roca Foradada (La Truita Roko)

karulo — Fri, 29 Apr 2011 16:26:57 +0000

La Roca Foradada (La Truita Roko)

Iam, antaŭ longa tempo, la diablo sukcesis regi Montserrat brute kaj terorige, transformante la montaron en scenejon de siaj plej fiaj agoj. Ŝajne nenio en la ĉirkaŭaĵo fortis sufiĉe por renversi la situacion kaj oni kredis ke Dio estis forgesinta pri tiu malfeliĉa mondero. Tamen, la konstanta preĝado de la tieaj piuloj atingis la Virgulinon kiu, ĝenata de la diablaj fiagoj, decidis puni la abomenindan estaĵon. Ŝi turnis sin al lia persekuto. La diablo, sciinte pri la alveno de la Virgulino, poltrone ekkuris tra la montopintoj. En sia freneza fuĝado, li frakasis sin kontraŭ unu el la grandaj rokoj kiuj staris antaŭ lia vojo. La frapo tiel fortis ke la roko truiĝis en la mezo kaj lasis la diablon ĝin trapasi. Jam en la alia flanko, la diablo piedbatis alteren originante iun puton per kiu li direktis sin al infero, de kie li neniam plu revenis. Jen fine, Montserrat ekestis libera de la diabla fidomino.

Laŭ popoldiro, tiu kiu trairas la truon kun plena akvujo ĉe la mano revenos poste alisekse transformita, t.e., ino revenos malino kaj inverse.

Foto de Pep Gorka

La Santa Creu

karulo — Tue, 05 Apr 2011 10:50:49 +0000

Ermita de la Santa Creu